БИШКЕК, 15-авг. — Sputnik. Кыргызстандык балбан Мээрим Жуманазарова Эстонияда өтүп жаткан жаштар арасындагы дүйнө чемпионатында экинчи орунду алды. Бул туурасында Бириккен күрөш федерациясынын расмий сайтында айтылат.
Турнир 12-августта Эстониянын Таллин шаарында башталган, 20-августта жыйынтыкталат. Мээрим Жуманазарова килем үстүндө 68 килограмм салмакта беттешип, жалпысынан төрт кармаш өткөрдү.
Финалда япониялык Наруха Мацуюкиге 2:4 эсеби менен жеңилип, экинчи орунду камсыздады.
Мээрим Жуманазарова 20 жашта. Жаштар арасында Азиянын үч жолку чемпиону жана чоңдор арасындагы Азия чемпионатынын күмүш, коло байге ээси. Белгилей кетсек, Жумазанарова жаштар арасындагы дүйнө чемпионатынын финалына чыккан экинчи кыргызстандык балбан кыз. Буга чейин Айпери Медет кызы финалда күрөшүп, чемпион болгон.