БИШКЕК, 13-авг. — Sputnik. Курсан Асанов аны Кой-Ташта Алмазбек Атамбаевден акча алды деген айыптоолор боюнча Sputnik Кыргызстан агенттигинин кабарчысынын суроолоруна жооп берип жатып, алардын бардыгын четке какты.
13-августта кызматтан алынган ички иштер министринин орун басары Курсан Асанов 8-августта Алмазбек Атамбаевди суракка алып келүү үчүн аны менен сүйлөшүүлөрдү жүргүзгөн учуру видеого тартылган.
Бүгүн, 13-августта, социалдык тармактарда Асанов Атамбаевден акча, зер буюмдар жана маанилүү документтер салынган пакет алып жатат делген видео тарады.
"Андай эч нерсе болгон эмес", — деди ал.
Курсан Асанов кызматтан алынышы боюнча өзүнүн пикирин билдирип, мамлекеттин кызыкчылыгын жеке кызыкчылыгынан жогору койгонун айткан.