БИШКЕК, 12-авг. — Sputnik. Айсулуу Тыныбекова баштаган кыргызстандык балбан кыздар Сочиде (Россия) машыгат. Бул туурасында Жаштар иши, дене тарбия жана спорт агенттигинен кабарлашты.
Ага ылайык, беш спортчу кыз 12-25-август күндөрү аталган калаада болушат.
"Айсулуу Тыныбекова жана Айпери Медет кызы машыктыруучу Нурбек Изабеков менен Сочиге 12-августта барат. Ал эми 17-августта аларга балбандар Мээрим Жуманазарова, Нураида Анаркулова жана Назира Марсбек кызы кошулат", — деп айтылат маалыматта.
Спортчулардын машыгуусу үчүн Спорт агенттиги 643 миң сом бөлгөн.
Үстүбүздөгү жылдын 4-августунда Айсулуу Тыныбекова алган жаракатына байланыштуу Польшадагы эл аралык турнирдин финалдык беттешине катыша албай калган болчу.