Апам үч тилде сүйлөп, өз учурунда сабаттуу аялдардын катарына кирген. Бирок аны эл душманынын аялы деп жумушка албай, расмий бийлик ага бир топ бут тосууларды жасаган. Бул тууралуу Роза Айтматова Sputnik Кыргызстан радиосуна маек куруп жатып билдирди.
Анын айтымында, апасы астма илдетине чалдыгып, кара жумушта иштей алган эмес.
"Атам репрессиялангандан кийин биздин үй-бүлөгө "эл душманынын аялы жана балдары" деген жалаа жабылды. Анын айынан апам төрт баласы менен жумушсуз калып, бир топ запкы тартты. Иш сурап кайда барбасын алышпайт. Кара жумушка түртүшүп, тамеки талааларында иштетүүгө аракет кылышкан. Апамдын астмасы бар болгондуктан, ал кара жумушка жарабайт эле. Апам бир жолу атамдын кол астында иштеген мамлекеттик кызматкерге барып жумуш сураптыр. Ал киши "силер эл душманынын үй-бүлөсү болосуңар, балдарыңды бага албасаң таратып жибер же ачкадан өлтүр" деп катуу айтыптыр. Ошол окуяны апам өмүрү өткөнчө эстен чыгарбай айтып, нааразы болуп жүрдү. Бирок, бактыга жараша, жакшы адамдар да кезигип, апама жумуш берип, ар тараптан колдоо көрсөтүшүптүр. Алардын бири Зудерман деген немец улутундагы киши болсо, экинчиси, агамдын "Саманчынын жолу" аттуу чыгармасындагы Толгонай апанын уулу Субанбек деген киши болгон", — деди Айтматова.
Ал ошондой эле Нагима Айтматова өз мезгилиндеги билимдүү аялдардын катарына кирип, гимназияны аяктап, стенографист болуп иштегенин кошумчалады.