БИШКЕК, 8-авг. — Sputnik. Кой-Ташта мурдагы президент Алмазбек Атамбаевдин үйүнө жакын жерде эл менен милиция кагышкан учуру видеого тартылып калган. Андан эл тарапка милиция кызматкерлери жаадыра таш атып жатканын көрүүгө болот.
Атамбаевдин үйүнө бет алган элдин жоон тобун милиция өткөрбөй койгон. Андан соң милиционерлер элге карай таш ыргытып бир топ оолактатты. Ошол эле учурда спецназ калканы менен милициянын артынан келген.
Белгилей кетсек, 7-августта кечки саат 20.00дөр чамасында УКМКнын атайын даярдыктагы аскерлери мурдагы президент Алмазбек Атамбаевдин Кой-Таштагы үйүн басып киришкен. Анда ок атылып, 43 киши түрдүү жаракаттарды алган. Акыркы маалымат боюнча, алган жараатынан бир жоокер ооруканада каза болду.
УКМК Атамбаевдин үйү тарабынан спецназды көздөй ок чыгып жатканын билдирүүдө. Мурдагы президентти кармоо аракети азыркыга чейин жүрүп жатат.