7-август түнү Кой-Ташта болгон кандуу окуяны мыйзам тарабынан алып карасак, албетте, туура эмес. Эми аны чечүүнүн бир гана жолу бар. Эки тарап тез арада жолугуп, бетме-бет сүйлөшүү менен курчуган абалды жөнгө салышы керек. Мындай пикирин Азамат Темиркулов Sputnik Кыргызстан радиосуна билдирди.
Анын айтымында, республикадагы чыңалган абалды жөнгө салуу эми саясатчылардын колунда.
"Биз мыйзамдын негизинде жашаган мамлекетпиз дегенибиз менен учурда мыйзам талаасынан чыгып кеттик. Эгер мыйзамдын чегинде жашаган болсок, анын өкүлдөрү болгон укук коргоо органдарынын мүчөлөрүнө, жоокерлерге кол салбайт элек. Кыргыз коомчулугу биринчи кезекте өзүнө зыян кылып жаткандыгын, ата-бабадан калган жер биздики экенин түшүнүшү зарыл. Ал эми аткаминерлер учурда абалды колго алып, чукул жыйындарды өткөрүп, тирешкен эки тарап сүйлөшүү жолу менен гана тез арада абалды жөнгө салышса, кан төгүүлөрдүн алдын алышкан болор эле", — деди Темиркулов.
Эске салсак, Улуттук коопсуздук боюнча мамлекеттик комитет 7-август күнү Алмазбек Атамбаевди кармоо боюнча операция баштаган. Мурунку президенттин Кой-Таштагы үйүнө атайын даярдыктагы бөлүктүн жоокерлери киргизилип, Атамбаевдин тарапташтары менен кагылышкан. Ок атылып, бир жоокер каза болду. Дагы 45 адам ар кандай жаракат менен ооруканада.