БИШКЕК, 8-авг. — Sputnik. Мурдагы президент Алмазбек Атамбаевди укук коргоо органдары ИИМдин Башкы тергөө башкармалыгына алып келишти. Бул тууралуу министрликтин маалымат кызматына таянуу менен Sputnik Жакынкы чет өлкө Telegram-каналы жазып чыкты.
Укук коргоо органдары Атамбаевди бүгүн, 8-августта, Кой-Таштагы үйүнөн кармаган болчу.
Эске салсак, 7-августта кечинде УКМК мурдагы президент Алмазбек Атамбаевди кармоо боюнча атайын операция жүргүзгөн. Бирок андан майнап чыккан эмес. Акыркы маалыматтар боюнча, кагылышуудан эки күндөн бери 85 киши жаракат алып, спецназдын бир жоокери каза болгон.
Өлкө президенти Сооронбай Жээнбеков 8-августта Коопсуздук кеңешинин жыйынын өткөрүп, Атамбаевдин аракети боюнча өзүнүн пикирин билдирген. Жээнбеков Атамбаев мурда шектүү катары суракка чакырылып келген болсо, эми оор кылмыш жасаган киши катары чакырыларын айткан.
Жогорку Кеңеш дагы бүгүн чукул жыйынга чогулган.