БИШКЕК, 3-авг. — Sputnik. Салык кызматы июль айында салык жана камсыздандыруу төгүмдөрү боюнча планды ашыгы менен аткарды. Бул туурасында аталган мекеменин маалымат кызматы кабарлады.
Билдирмеге караганда, Салык кызматы июль айында 6 миллиард 747,1 миллион сом салык жана төлөмдөрдү чогултуп, белгиленген план 102,2 пайызга аткарылган. Муну менен 2018-жылдын июль айына салыштырмалуу салыктардын түшүшү 754,4 миллион сомго өскөнү белгиленет.
Ошол эле учурда, 6 айдын жыйынтыгы боюнча толугу менен чогултулбай калган салыктардын (1 миллиард 517,4 миллион сом) жана камсыздандыруу төгүмдөрдүн (750,1 миллион сом) суммасы июль айындагы пландын ашыгы менен аткаруунун эсебинен салык боюнча 147,1 миллион сомго жана социалдык төгүмдөр боюнча 79,7 миллион сомго кыскарган.