БИШКЕК, 30-июл. — Sputnik. Кыргызстандык мушкер Бусурманкул Абдубаит уулунун M-1 уюмундагы кезектеги кармашы 30-августта Оренбург (Россия) шаарында өтмөй болду. Бул туурасында аталган уюмдун Instagram баракчасында айтылат.
Эске сала кетсек, Абдубаит уулу 20-июлда Ингушетиянын Таргим шаарында жергиликтүү спортчу Андрей Лежнев менен беттешмек. Бирок кийинчерээк М-1 уюму Instagram баракчасы турнир Ингушетиядагы административдик өзгөрүүлөргө байланыштуу өтпөй калганын билдирип, спорт күйөрмандарынан кечирим сураган.
Бусурманкул Абдубаит уулу М-1 Global уюмунда 2017-жылдан бери күч сынашып келет. Алгачкы ирет бразилиялык Диего Давелло менен беттешип тең чыкса, кийинки реванш-кармашта Давеллону утуп алган. Ошондон кийин уюм спортчу менен эки жылга келишим түзүүгө кол сунган.
Соңку беттешинде М-1 уюмунун мурдагы чемпиону Максим Дивнич жана Залимбек Омаров аттуу мушкерлерди жеңген.
M-1 жыл башында кыргызстандык мушкер быйыл чемпиондук наам үчүн беттешүүгө толук мүмкүнчүлүгү бар экендигин билдирген.