"Психолог менен баарлашуу" рубрикасынын бул жолку чыгарылышында үчүнчү аял алууну ойлоп жүргөн эркектин каты жарыяланды.
...Бир эмес, эки аял менен ажырашып, ара жолдо калдым.
Мен окуп ага көп көңүл бура албай калгандыктан таарынып, кызганып жатып чарчатып жиберген. Төрт жыл бирге түтүн булаткандан кийин экөөбүздүн жол эки башка экенин түшүнүп ажыраштык.
Бойдокчулукка көнө албай, кызымды сагынып, аялымды кайра алып келип да көрдүм. Бирок баягы эле уруш-талаш кайталангандыктан сот менен ажырашууга туура келди. Азыр кызыма алимент төлөйм.
Окуумду бүтүп жумушка орноштум, жалгыздыктан тажадым. Ошентип жүрүп жумушумдан өзүмдөн эки жаш улуу кыз менен ымалабыз келишип, жакшы болуп кеттик. Жарым жылдай сүйлөшүп жүрүп баш коштук. Өзүнө тың, жашоонун ачуу-таттуусун татып калган адам эле. Буга чейин турмушка чыгып, бирок бат эле ажырашып кетиптир, баласы жок болчу. Ал ата-энем менен жакшы тил табышып кетти. Мага жасаган мамилеси да башкача эле, бирок кызымдан кызгана берчү. Ага барарда үйдө бир сыйра уруш чыгат. Айтор, ошентип жүрүп араң көндү. Экинчи аялым менен алты жылдай жашадым, бирок төрөй албай койду. Көрүнбөгөн жери калган жок. Баласаак жаным кызымды ойлоп эле туруп алдым. Көп балалуу болгум келерин айтсам, экинчи келинчегим "кечир, сага жакшы жубай болуп төрөп бере алган жокмун" деп кетип калды. Аялдын санын көбөйтпөйүн деп артынан бардым, болгон жок. Ошентип экинчи жолу турмушум бузулду.
Гүлнара Жасоолова, психолог:
--Үй-бүлө курарда түгөйлөр сүйүүдөн мурда бири-бирин түшүнүп баш кошсо демекчимин. Эркек менен аялдын ортосунда ишенич, анан өз ара түшүнүшүү болгону жакшы. Түшүнбөсө, ишенбесе кызганыч сыяктуу ар кандай шылтоолор чыга берет да акыры ажырашууга алып келет. Үй-бүлөнүн бузулушу мамлекеттин урашына барабар, ошондуктан жаштар мындай чечим кабыл алардан мурда жакшылап ойлонушса.
Кат жазган кишиге айтарым, эгерде кызыңыздын атасыз өсүшүн каалабасаңыз биринчи аялыңыз менен жарашууга аракет кылып көрүңүз. Албетте, эгер ал турмушка чыгып кетпесе. Балким, ал деле кызына карап сизди күтүп жүргөндүр. Көп учурда кыргыздын ажырашкан аялдары баласы бар болсо, оңой менен экинчи бүлө күтө албайт.
Эгерде "жок, аны менен бирге жашай албайбыз, такыр эле жакпайт" десеңиз, анда өз бактыңыз үчүн күрөшүңүз.
"Үчүнчү аял алсам теңтуштар, эл эмне дейт" деп кооптонуп жатасыз. Бирок ар кимдин өз жашоосу бар. Бир айтат, эки айтат ошону менен алардын сиз менен иши да болбой калат. Турмуштан жолуңузду табышыңыз керек. Бирок аялдын санын көбөйтүп, ар кимдин тагдырына балта чаппай, үчүнчү ирет турмуш куруунун алдында жакшылап ойлонуңуз. Алчу адамыңыз менен дароо үйлөнүп албай экөөңөр бири-бириңерди түшүнгүдөй болгула. «Кызым бар эле» деп аны шылтоо кылып, дагы ажырашып кетпегидей болушуңуз керек.
Кат жазган кишиге дагы бир айтарым, күнөө бир тараптан эч качан кетпейт. Ошондуктан мамиледе текебер болбой, аялды да түшүнө билүүнү үйрөнүшүңүз керек.