БИШКЕК, 26-июл. — Sputnik. Кыргызстандын жаш ишкерлери башка бизнесмендерден эмнеси менен айырмалана турганын Орус-кыргыз өнүктүрүү фондусунун төрагасы Эркин Асрандиев Кыргызстан менен Россиянын жаш лидерлеринин форумунда айтып берди.
Анын сөзүнө караганда, өз ишин баштайм деген кыргызстандык жаштарда бир катар артыкчылыктар бар.
"Албетте, ишкерлер укук маселелерине келгенде бир аз аксашат. Бирок бизнести пландоо жаатындагы билимдин жетишсиздиги бир гана жаштарда эле кездешпейт. Бизнестеги кыйынчылык жаш-кары деп тандабайт. Жаш ишкерлер көйгөй эмнеде болуп жатканын дароо илип кетишет, бат үйрөнүшөт жана абалдан тез чыгып кетет", — деди Асрандиев.
Ал ошондой эле жаш ишкерлер бизнесте өз ордун таап калгандарга караганда кеңештерди туура кабыл алып, аны иш жүзүнө ашырганга аракет кыларын кошумчалады.
Форумдун катышуучуларына улуу жазуучу Чыңгыз Айтматовдун үй-музейи көрсөтүлөт. Андан сырткары, Кырчын жайлоосу менен "Рух Ордо" маданий борборуна экскурсия уюштурулат.
Иш-чаранын соңунда Кыргызстан менен Россиянын жылдарын эки мамлекетте өткөрүү боюнча иш-аракеттердин планы иштелип чыгат.