Башка өлкөдө билим алам дегендер үчүн мүмкүнчүлүктөр абдан көп. Мындай пикирин Алмаз Арапов Sputnik Кыргызстан радиосунун таңкы эфиринде маек куруп жатып билдирди.
Анын айтымында, керектүү маалыматтарга ээ болуш үчүн жаштарга болгону изденүү жетиштүү.
"Учурда чет өлкөдө билим алам деген жаштар арбын. Ошол эле маалда алар үчүн мүмкүнчүлүктөр да кеңири. Болгону окуу жайлар боюнча интернеттен маалымат алып, окууга тапшыруунун жолдорун издөө жетиштүү. Тилекке каршы, айрым кыргыздын жаштары бир күндө 3-4 саатын бирөөнүн сүрөтүн же видеосун көрүүгө жумшап жатат. Анын ордуна пайдалуу маалыматтарды, башка өлкөдөн кантип билим алса болорун издесе, келечеги үчүн керектүү кадам таштамак. Чет жакта окугусу келгендер ошого жараша план түзүп, аракет кылышы шарт. Ал үчүн биринчи кезекте чет тилдерин билиши керек. Андан сырткары, окуу жай интеллектуалдык деңгээлди карайт. Атайын маектешүү өткөрүп, көпчүлүк учурда "Биздин университетке сени эмне үчүн кабыл алышыбыз керек?" деген суроону узатышат", — деди Арапов.
Ошондой эле ал чет жерден билим алгысы келген кыргыз жаштары көбүнчө АКШ, Европада окуганга аракет кылышарын кошумчалады.