БИШКЕК, 25-июл. — Sputnik. Кыргыз-тажик чек арасындагы жаңжалдан улам Баткен шаарына көчүрүлгөн Ак-Сай менен Капчыгай айылдарынын 674 тургуну өз үйлөрүнө кайтты. Бул тууралуу Баткен облустук администрациясынын маалымат кызматы кабарлады.
Ага ылайык, бүгүн, 25-июлда, эртең мененки саат 7:10до тосулган жол ачылгандан кийин жашоочулар үйлөрүнө жеткен.
"22-июлда 315 жаран убактылуу көчүрүлүп келген. 23-июлда түштөн кийин абал курчуганда дагы келип, кишилердин саны 674кө жеткен. Бирок алардын 263ү туугандарынын үйүндө болду. Облус жетекчилиги 415 жаранды жайгаштырып, тамак-аш менен камсыздап турду", — деп маалымат кызматы билдирди.
Ал эми 23-июлда тажик тараптан эки ирет ок атылып, кыргызстандык чек арачылардын бирөө жарадар болгон.
Кечээ жолдор жабылып, нааразы болгон эл Баткен облустук администрациясынын алдына митингге чогулган.