Билим берүү боюнча Кыргызстан алты гана чет мамлекет менен келишим түзгөн. Бул тууралуу Нурсултан Кубанов Sputnik Кыргызстан радиосуна маек куруп жатып билдирди.
Анын айтымында, биздин студенттер чет өлкөгө барып, ал жакта анча өнүгө элек тармактарды тандап алышат.
"Эгер бизде эл аралык деңгээлдеги мыкты дарыгерлер болсун десек, анда бул тармак боюнча Германия менен келишим түзгөнүбүз жакшы. Анткени ал жакта медицина абдан өнүккөн. Мыкты инженерлерди даярдаш үчүн Кытай, Түштүк Корея мамлекеттерине студенттерди жиберсек болот. Гуманитардык илимдерден Европа өлкөлөрүнө артыкчылык берилиши керек. Айыл чарба тармагын өнүктүрөбүз десек, студенттерди Россияга жөнөткөнүбүз туура. Бирок бүгүнкү күндө Кыргызстандын болгону алты өлкө менен келишими бар. Бул өтө эле аз көрсөткүч", — деди Кубанов.
Ошондой эле ал билим берүүдөгү гранттык орундарды көбүнесе Кытай жана Венгрия берип жаткандыгын кошумчалады.