БИШКЕК, 22-июл. — Sputnik. Эки чет элдик жаранды тартип коргоо органдары Бишкек калаасындагы батирлердин биринде уурулук кылган деген шек менен кармады. Бул туурасында шаардык милициядан кабарлашты.
"Биринчи Май райондук милициясынын бөлүмүнө 7-июнда үйүн карактап кеткендерге чара көрүү өтүнүчү менен аял арыз жазып кайрылган. Ал белгисиз адамдар батиринин кулпусун сындырып, 113 миң 400 сомун жана 3 миң 870 долларын алып, из жашыргандыгын айткан. Факты Кылмыш жана жоруктардын бирдиктүү реестрине Жазык кодексинин 200-беренесинин ("Уурулук") негизинде катталган", — деп айтылат маалыматта.
Бишкектеги Криминалдык милициянын кызматкерлери уурулук кылган деген шек менен эки адамды кармады. Алар Грузиянын 53 жаштагы эки жараны болуп чыккан. Учурда алар убактылуу кармоо жайында.
Тартип коргоо органдары шектүүлөрдүн Бишкектеги буга окшогон башка дагы кандай уурулукка тиешеси бардыгын аныктоо үчүн тергөө иштерин баштаган.