БИШКЕК, 19-июл. — Sputnik. Дем алыш күндөрү аба ырайы ысык болору айтылгандыктан, Бишкек мэриясы өсүмдүктөрдү сугаруу жана көчөлөргө суу чачуу иштерин күчөтөт. Бул тууралуу муниципалитеттен кабарлашты.
"Бул күндөрү шаардагы өсүмдүктөр көбүрөөк сугарылат. Мэриянын бул талабын аткарбаган ишканалардын жетекчилери жоопкерчиликке тартылат. Ал эми "Тазалык" ишканасы көчөлөрдү көбүрөөк жууйт", — деп айтылат билдирүүдө.
Шаар тургундары менен коноктор саат 10.00дөн 19.00гө чейин калаанын борборундагы фонтандардын салкын илебине келсе болот. Ал эми "Ала-Тоо" аянты менен Тарых музейинин алдындагы фонтандар 21.00гө чейин иштейт.
Шаар мэриясы бул күндөрү тургундарды ачык асман алдында көп жүрүп, ден соолугуна залака тийгизип алуудан оолак болууга чакырат.