Ымыркайы бар үйдүн полу нымдуу чүпүрөк менен жумасына эки ирет жуулууга тийиш. Өзгөчө бала жөрмөлөп же жаңы баскан кезинде бул өтө маанилүү. Мындай пикирин Бактыгүл Ыбышева Sputnik Кыргызстан радиосунда маек куруп жатып билдирди.
Анын айтымында, айрым энелер балдарына кандайдыр бир микробдорду жуктуруп алуудан коркуп, түрдүү тазалоочу химиялык заттар менен күн сайын бөлмөлөрдү жууп, тазалай беришет. Бул туура эмес. Мындай шартта балада иммунитет айрым нерселерге пайда болбой, жыйынтыгында кийин ошол затка аллергия болушу мүмкүн.
"Наристенин тазалыгына эне кам көрөт. Албетте, ымыркай жашаган үйдө полдун, анын колдонгон идиш-аяктарынын таза болушу шарт. Бирок аларды жууп-тазалоочу каражаттарды тандоодо табигыйларын алган дурус. Анткени түрдүү химия кошулган каражаттар чүрпөнүн дем алуу органдарына же терисине билинбей эле зыян тийгизип коюшу мүмкүн. Ошондой эле полду таза кармоо да маанилүү. Жумасына сууланган чүпүрөк менен эки ирет сүртүп туруу керек. Кире беришке сырттан келген чаңды кармап калуучу килемче сөзсүз төшөлүүсү зарыл. Ошондой эле ал килемчени бат-баттан жууп туруу талап кылынат", — деди Ыбышева.
Дарыгер үй жыйнап жаткан учурда бөбөктөрдү сыртка сейилдөөгө чыгарып коюу жана бүтүргөн соң бир аз убакытка терезелерди ачык кармоо керектигин кошумчалады.