Оюн талаасында жергиликтүүлөрдүн жети, Новосибирскидеги кыргыздардан түзүлгөн бир команда күч сынашкан. Бул тууралуу оюнга катышып келген Новосибирск облусундагы Көк бөрү федерациясынын түптөөчүсү жана көк бөрү командасынын жетекчиси Каныбек Акаев билдирди.
Анын айтымында, "Новосибирск" командасы бул мелдешке быйыл биринчи жолу катышып жатат.
"Өзүбүздүн аттар менен оюн көргөзөлү деп алып баратканбыз. Тилекке каршы, жолдон автоунаабыз бузулуп калып кайра артка алып келүүгө туура келди. Анан улакчылар эле барып ошол жактан ат алдык. Бул мелдешке быйыл биринчи ирет катышып жатабыз. "Кыргыздар келиптир" деп оюнду көрүүгө эл аябай көп келди", — деди Акаев.
Мелдештин соңунда жергиликтүү "Онгудай" деген көк бөрү командасы биринчи орунду алган. Алтайдын көк бөрү боюнча республикалык чемпионаты жыл сайын өтүп турат экен.
"Өзүбүздүн аттарыбыз жок болгондуктан катуу каршылык көрсөтө албай калдык. Башында эле буга чейин чемпион болуп келген "Онгудай" командасы менен атаандашып, негизги оюнда тең чыктык. Бирок буллиттен 3:4 эсеби менен утулуп калдык. Жалпысынан оюн талаасына эки жолу эле чыктык. Буюрса, кийинки жылы мыкты даярданып барабыз. Жергиликтүү командаларда алтайлыктар жана орус улутундагы жигиттер ойнойт экен. Жаштар командасы жазында Алматыдагы Азия чемпионатка катышып келиптир", — деди Акаев.
Сергей Тузачинов биринчи болуп Алтайда 2004-жылы көк бөрү оюнун негиздеген. Ал оюндар эл аралык эреже боюнча тай казан менен өтөт.
Белгилей кетсек, Россиянын Көк бөрү федерациясын Кристина Карамышина жетектейт. Мындан сырткары, 2019-жылдын март айында Россиянын бүт аймагындагы Көк бөрү федерацияларынын союзу түзүлгөн.