БИШКЕК, 6-июл. — Sputnik. Аляска штатынын бир катар райондорунда тарыхындагы эң ысык аба ырайы катталгандыгын РИА Новости жазды.
Маалыматты АКШнын Метеорология боюнча улуттук кызматы берген.
Бейшемби, 4-июлда, аба ырайынын температурасы Алясканын Анкориж деп аталган ири шаарында +32,2 градуска жеткен. Буга чейинки рекорд 1969-жылы июнь айында катталып, анда 29,4 градус ысык болгон.
Метеорологдор мындан сырткары эл жашаган аймактар — Кенайда 31,6, ал эми Кинг-Салмондо 31,6 градус ысык болгонун байкаган.
Аталган жерлерде 30-31 градустан ашкан ысык аба ырайы 1903 жана 1953-жылдары катталган.
Адистер Аляскада күндүн табы элди ушул күндөрү — ишемби жана жекшембиде да кактай тургандыгын айткан.