БИШКЕК, 5-июл. — Sputnik. Эки киши өлтүрүлүп жана бир аял барымтага алынган аңчылардын "Хан-Теңири" лагери Ысык-Көлдүн Эңилчек айылынан чыгышты көздөй 25 чакырым аралыкта жайгашкан. Бул туурасында Ысык-Көл облустук милициясынын маалымат кызматы билдирди.
Эске салсак, Ак-Суу райондук нөөмөт бөлүмүнө 4-июлда болжол менен саат 12:20лар чамасында билдирүү түшкөн. Анда Каракол шаарындагы чек ара кызматынын аскер бѳлүгүнөн белгисиз адам Сырт өрөөнүндөгү Эңилчек жайлоосунда жайгашкан "Хан-Теңири" аңчылык лагердин башчысынын 49 жаштагы орун басарын жана 31 жаштагы кызматкерин атып кеткени маалымдалган.
Окуядан кийин кырсык болгон жерге Ысык-Көл облусунун ИИБинин атайын даярдыктагы аскерлери киши өлтүргөн адамды кармоо үчүн чыгып кеткени кабарланган.
Ысык-Көл облусундагы Эңилчек айылына жакын жайгашкан "Хан-Теңири" лагеринде эмне окуя болгондугу жана учурда жүргүзүлүп жаткан аскердик операция тууралуу Sputnik Кыргызстан агенттигинин тексттик трансляциясынан окуп турсаңыз болот.