БАЛЫКЧЫ, 25-июн. — Sputnik. Балыкчыдагы пляждардын аймагына желим бөтөлкөлөр үчүн атайын контейнерлер орнотулду. Бул тууралуу Sputnik Кыргызстан агенттигинин аймактык кабарчысы билдирди.
Анын айтымында, "Толкун", "Сейил" жана "Почта" пляждарына бирден контейнер коюлган. Бул демилге шаардык Көрктөндүрүү жана санитардык тазалоо мекемесинин жетекчиси Марат Таржиевге таандык.
"Желим бөтөлкөлөр 100 жылда чирип жок болот. Мындан улам пляжга келгендер бөтөлкөлөрдү туш келди ыргытпашы үчүн атайын контейнерлерди орноттук", — деди Таржиев.
Учурда желим бөтөлкөлөрдү чогултуп, аны майдалоочу аппарат сатып алуу пландалууда. Майдаланган сырье Бишкектеги кайра иштетүүчү цехтерге жөнөтүлүшү ыктымал. Тажиев келечекте кайра иштетүүчү цехти Балыкчыда ачуу пландалып жатканын кошумчалады.