БИШКЕК, 23-июн. — Sputnik. Азиз Батукаевди бошотуу ишине тиешеси бар деп күнөөлөнгөн Нарын шаардык сотунун судьясы Жапар Эрматов үй камагына алынды. Бул туурасында маалымат булак билдирди.
Эске салсак, 23-майда Башкы прокуратура Нарын шаарынын мурдагы судьясы Жапар Эрматов боюнча тергөө иштери башталган. Ал Батукаевдин "айыккыс оорусунан" улам абактан мөөнөтүнөн мурда бошотуу сунуштамасын тыкыр иликтеп чыкпастан, аны канааттандырып берген деп шектелген. Нарын шаарынын мурдагы сотуна Кылмыш жаза кодексинин 335-беренесинин 1-бөлүгү ("Билип туруп акыйкатсыз өкүм чыгаруу") жана 317-беренесинин 1-бөлүгү ("Коррупция") боюнча айып тагылып, сотко чейинки тергөө иштери башталган. Бирок камалган эмес.
Аламүдүн райондук соту Батукаевди 16 жыл 8 айга эркинен ажыраткан. Соттун чечими менен жаза мөөнөтүнүн жарымы өткөндө абактан чыгарылган.
Көп өтпөй Батукаевди камактан бошотуу өкүмүн чыгарган Нарын шаарынын мурунку судьясына да кылмыш иши козголгон. Ал эми 5-июнда камакка алынган экс-прокурор Аида Салянованы өткөн апта аягында Биринчи Май райондук соту 26-августка чейин камакта калтырды.
Андан кийин ошол кезде ЖАМКты жетектеп турган Зарылбек Рысалиев суракка чакырылып, имараттан чыккандан кийин ооруканага кайрылууга аргасыз болгон. Дарыгерлер анын сүйлөөсү начарлап, абалы оор экенин айтышкан.