БИШКЕК, 21-июн. — Sputnik. "Токмок" көзөмөл өткөрүү бекетинин жанындагы атышуу боюнча Токмок шаардык соту өкүм чыгарды. Бул тууралуу Жогорку соттун расмий сайтында айтылат.
Эске сала кетсек, үстүбүздөгү жылдын 26-январына караган түнү "Токмок" көзөмөл өткөрүү бекетинде аткезчилер ортосунда чыр-чатак болуп, атышууга чейин жеткен. Кийин анын катышуучулары менен башка күбөлөр суракка алынган. Ошол учурда аталган окуяга Жогорку Кеңештин депутаты Урмат Самаевдин да тиешеси бар экендиги айтылган.
Сот отурумунда шектүү Бейшенкулов чек арага Казакстандан келе жаткан досун күткөнү баргандыгын айткан. Ошол жерде турганда мурун тааныган Аскат Усенов аттуу киши экөө айтыша кетип, Бейшенкулов тапанча колдонгондугун тастыктаган.
Ал эми жабырлануучу Усенов шектүү делген Бейшенкулов чек арадан өткөн ар бир унаага 10 миң сомдон берип турасың деп талап койгондуктан уруша кеткендигин билдирген.
Сот тараптардын элдешкенин жана шектүүнүн 30-январдан бери камакта жатканын эске алып, аны эркиндикке чыгарып кылмыш ишин токтотту.