БИШКЕК, 18-июн. — Sputnik. Өзгөн шаарында тургундун үйүнөн 380 миң накталай акча менен бир миллион сомдук алтын буюм уурдоого шектелип беш киши кармалды. Бул тууралуу Sputnik Кыргызстан агенттигине облустук милициянын маалымат катчысы Жеңиш Аширбаев билдирди.
Анын айтымында, окуя үстүбүздөгү жылдын 28-мартында болгон. Өзгөн шаарынын 51 жаштагы тургуну милицияга арыз менен кайрылган.
"Криминалдык милиция кызматкерлеринин ыкчам иш-аракети менен шектүү катары беш адам кармалды. Өзбекстандын 59 жаштагы, Жалал-Абад облусунун 24 жаштагы эки тургуну, ошондой эле Өзгөн районунун 47 жана 43 жаштагы эки жашоочусу уурулукка шектелүүдө", — деди Аширбаев.
Алардын жашаган турак жайын тинтүүгө алган учурда алтын буюмдар далил катары табылган.
Учурда кылмышка шектүүлөргө карата Кылмыш жаза кодексинин 200-беренеси ("Уурдоо") менен кылмыш иши козголуп, сотко чейинки иштер башталганы айтылат.
Өзгөн райондук соту шектүүлөрдү эки айга камакка алуу чечимин чыгарып, алар Ош шаарындагы тергөө абагына киргизилген.