БИШКЕК, 18-июн. — Sputnik. Жогорку Кеңештин атайын комиссиясынын экс-президент Алмазбек Атамбаевге айып таккан корутундусу парламенттин кароосуна жөнөтүлдү. Бул тууралуу Sputnik Кыргызстан агенттигине Укук тартиби, кылмыштуулукка каршы күрөшүү жана коррупцияга каршы туруу комитетинин мүчөсү Жаныбек Бакчиев билдирди.
Эки күндүк иликтөөнүн натыйжасында экс-президентке коюлган дооматтардын саны тогуздан алтыга кыскартылган. Белгилей кетсек, аталган комиссия Атамбаевди экс-президент статусунан ажыратуу үчүн күнөө коюу боюнча иш алып барды.
"Комиссия корутундуну бизге жөнөтүп, комитеттен Жогорку Кеңештин кароосуна алып чыгууну сунуштады. Мен маалыматты эске алуу менен чечимди Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетке жиберүүнү айттым. Биз качан гана башкы прокурор укуктук баа берип, кылмыш иши тууралуу маселе көтөрүлгөндөн кийин гана бир нерсе дей алабыз. Азыр кол тийбестиктен ажыратуу маселеси турат, ал эми бул биздин комитеттин кароосуна жатпайт", — деди Бакчиев.
УКМКнын маалыматы боюнча, экс-президенттин ТЭЦти модернизациялоодогу коррупциялык иштерге тиешелүүлүгү боюнча иш өзүнчө бөлүнгөн. Атамбаевдин аты мамлекеттик тарых музейин оңдоодогу козголгон кылмыш иште да кездешери айтылды.
Ал арада экс-президенттин санаалаштары комиссиянын иши жана коюлуп жаткан дооматтар боюнча өз пикирин билдирди.