БИШКЕК, 13-июн. — Sputnik. 1-июнга карата элдин колундагы каражат 95,2 миллиард сомдон ашканын Улуттук банктан кабарлашты.
Жүгүртүүдөгү акча — бул насыялык уюмдардын кассаларында калган каражатты эске алуу менен эсептелген элдин каражаты. Кеп улуттук валюта туурасында гана болуп жатат.
Улуттук банктын маалымат кызматынын билдиргенине караганда, бул — финансылык регулятордун маалыматтары жарыялана баштаган 2007-жылдан берки рекорддук көрсөткүч. Май айында жүгүртүүдөгү акча дээрлик 2,6 миллиард сомго өскөн.
Буга чейинки рекорд 93,5 миллиардан бир аз ашыгыраак суммасы менен быйылкы жылдын 1-январында байкалган.
Бирок мындай көрүнүштүн күнгөйү менен тескейи боло турганын айткан экономисттер өтө көп болуп кеткен өсүш инфляцияга алып келе турганын эскертти.