БИШКЕК, 13-июн. — Sputnik. Президент Сооронбай Жээнбеков Кытай төрагасы Си Цзиньпин менен жолугушуу учурунда Кыргызстанга убадаланган 600 миллион юань (86,7 миллион доллардын тегереги — ред.) тууралуу эске салды.
"Апрель айындагы иш сапар учурунда 600 миллион юань жардам иретинде берилери тууралуу макулдашуулар болгон. Бул долбоордун иш жүзүнө ашарына үмүттөнөм", — деди Жээнбеков.
Жакында эле КР президентинин аппаратынын сырткы саясат бөлүмүнүн башчысы Данияр Сыдыков кеп болуп жаткан 600 миллион юань мамлекеттик ички процедураларга сарпталарын айткан.
Эске салсак, Си Цзиньпин Бишкекке 12-июнь күнү мамлекеттик сапары менен келген. Ал Шанхай кызматташтык уюмунун саммитине дагы катышмакчы. Эки тараптуу жолугушуулардын алкагында маанилүү делген 20 документке кол коюлары күтүлүүдө.