БИШКЕК, 7-июн. — Sputnik. Бүгүн, 7-июнда, кримтөбөл Азиз Батукаевдин мыйзамсыз боштондукка чыгып кетиши боюнча ИИМде сурак берип жатып ооруканага түшкөн ЖК депутаты Зарылбек Рысалиевдин абалы оор. Бул тууралуу эл өкүлү жаткырылган КР президентинин жана өкмөтүнүн иш башкармалыгынын клиникалык ооруканасынын реанимация бөлүмүнүн нөөмөттөгү дарыгери Sputnik Кыргызстандын кабарчысына билдирди.
Дарыгердин айтымында, аны экинчи ирет инсультка кабылды деген божомол болууда.
“Аны МРТ аппаратына тарттырып келишти. Бирок невролог анын жыйынтыгын көрө элек. Учурда абалы туруктуу оор деп бааланууда”, — деди дарыгер.
Эске салсак, бүгүн ИИМдин мурдагы башчысы, азыркы эл өкүлү Зарылбек Рысалиев Ички иштер министрлигинде сурак берип жаткан учурда абалы начарлап, ооруканага жеткирилген.
Ал эми ИИМден депутаттын абалы сурак маалында начарлап кетти деген маалымат чындыкка туура келбестигин айтышууда.
“Рысалиев саат 10.00гө ИИМдин тергөө кызматына суракка чакырылган. Эки саатка созулган сурактан кийин түшкү тамакка чыгышкан. Андан кайтып келе жатканда көчөдөн абалы начарлаган. Ошол жерден эле Тез жардам кызматы чакыртылып, ооруканага жеткирилди. Анын 48 саатка камакка алынды, учурда палатасы кайтарылып жатат деген маалымат жалган”, — деп айтылат билдирүүдө.
Батукаев иши
Аламүдүн райондук соту Батукаевди 16 жыл 8 айга эркинен ажыраткан. Соттун чечими менен жаза мөөнөтүнүн жарымы өткөндө абактан чыгарылган.
Көп өтпөй Батукаевди камактан бошотуу өкүмүн чыгарган Нарын шаарынын мурунку судьясына да кылмыш иши козголгон. Ал эми 5-июнда экс-прокурор Аида Салянова дагы камакка алынган.