БИШКЕК, 6-июн. — Sputnik. 2-июнда Кыргызстандын жаранына берилген паспорт менен "Манас" аэропортунан Стамбул шаарына учмакчы болгон коңшу мамлекеттин 29 жаштагы жараны кармалды. Бул тууралуу УКМКнын маалымат кызматы билдирди.
Иликтөөнүн жүрүшүндө паспорттогу серия Кыргызстандын Ош облусунун тургуну, 2002-жылы туулган А.у.Б. аттуу жаранга таандык экени аныкталган.
"Муну менен бирге "Манас" аэропортунун күтүү залында бул кылмыш тобунун уюштуруучусу, Кыргызстандын 52 жаштагы жараны кармалды. Анын жанынан 1987-жылы туулган Н.П. аттуу жарандын наамына даярдалган Кыргызстандын дагы бир жасалма паспорту табылды", — деп айтылат маалыматта.
"Жашаган жерин тинтүү учурунда 1987-жылы туулган С.Р. аттуу жарандын наамына даярдалган КР жалган паспорту табылып, алынган", — деп айтылат маалыматта.
УКМК берген маалыматка ылайык, даярдалып жасалмаланган документтер эл аралык террордук уюмдун рекруттарды согуштук зонага катышууга жиберип туруу максатында колдонулган. Учурда кармалган адамдар УКМКнын убактылуу кармоочу жайына киргизилип, тергөө амалдары жүрүүдө.