БИШКЕК, 3-июн. — Sputnik. "Кыргыз темир жолу" Мамлекеттик компаниясы" ишканасынын башкы инженери Николай Лиличенко казан мештеги жарылуунун чоо-жайын айтып берди.
Окуя 3-июнда саат 8:45тер чамасында болгон.
Лиличенконун айтымында, жүргүнчүлөрдү тейлеген фирманын кир жуучу цехиндеги суу ысыткан 40 тонналык казан меш жарылган. Бул боюнча комиссия түзүлүп, ички иликтөө жүргүзүлмөкчү.
"Төрт киши — күзөтчү менен жүргүнчүлөрдү тейлеген фирманын үч кызматкери жаракат алды. Цехтин терезелери сынган. Жарылуу бир нече себептен болушу мүмкүн, аны комиссия териштирет", — деди Лиличенко.
Окуя болгон жерди милиционерлер, Транспорт прокуратурасынын кызматкерлери карашты. Мамлекеттик экотехникалык инспекциясынын адистери да келе турганы айтылды.