БИШКЕК, 30-май — Sputnik. "Ала-Тоо" аянтынын бир нече жерин чиймелеп кеткен өспүрүм кечирим сурап, "Тазалыктын" кызматкерлери менен бирге иштеп берүүгө даяр. Бул тууралуу ишкананын маалымат катчысы Жибек Каракеева билдирди.
Эске салсак, 29-майга караган түнү Бишкектин борбордук аянтына белгисиз бирөө Instagram-аккаунттун дарегин жазып кеткен. Эртеси күнү аны мэрия издей баштаган.
Каракееванын айтымында, ал ээнбаштык кылган бала менен байланышып, "Тазалык" ишканасынын кызматкерлеринен кечирим суроосун жана алар менен бирге иштеп берүүнү сунуштаган. Өспүрүм макул болгон. Бүгүн жолугушуунун убакыт-сааты такталат.