БИШКЕК, 29-май — Sputnik. Ош шаарынын спортчулары каратэ боюнча эки башка дүйнөлүк чемпионаттан 20 медалга ээ болушту. Бул туурасында Ош шаардык дене тарбия жана спорт комитетинен кабарлашты.
Спортчуларды кечээ, 28-майда, Ош шаарындагы аба майдандан комитеттин төрагасы Кылыч Саркарбаев, федерациянын өкүлдөрү, машыктыруучулар жана алардын жакындары салтанаттуу тосуп алышкан.
"Саркарбаев Ош шаарынын мэри Таалайбек Сарыбашовдун атынан алдыңкы орундарга ээ болгон спортчуларды куттуктап, эки дүйнө биринчилигинде жараткан ийгиликтерин баса белгиледи. Каратэчилерге ак калпак кийгизилсе, машыктыруучуларына калпак менен чепкен жабылды", — деп айтылат маалыматта.
Белгилей кетсек, Түркиянын Анталия шаарында Эл аралык уруш өнөрү федерациясы тарабынан 20-23-май күндөрү каратэ боюнча дүйнө чемпионатынын биринчи баскычы өткөн. Алты мамлекеттен барган 500 катышуучунун арасында 6-10 жаштагы кыргызстандык спорчтулар күч сынашкан. Натыйжада алты алтын, эки күмүш жана бир коло байгеге ээ болушкан.
Кумитэ боюнча тайпалык кармашта Ош шаарынын 8-9 жаштагы үч спортчусу Имран Абдугуламов, Искендербек Ташбалтаев жана Нурислам Пусуров 3-орунга ээ болушкан. Ушул эле спортчулар ката боюнча командалык мелдеште экинчи орунга татыган.