БИШКЕК, 29-май — Sputnik. Машинага жашынып алып чек арадан өтүп кетүүгө аракет кылган жаран кармалды. Бул тууралуу Мамлекеттик чек ара кызматынан билдиришти.
Ага ылайык, 29-майда Талас облусундагы "Чоң-Капка" көзөмөл өткөрүү пунктунан чек арачылар Ford Transit автоунаасын токтотушкан. Анын ичинен төшөккө оронуп, үстүн жыгач менен бастырып алган киши табылган. Айдоочу аны чек арадан билгизбей алып өтүүгө аракет кылган.
Текшерүү учурунда аныкталгандай, машинага жашынган кишиге соттун чечими менен чет жакка чыгууга тыюу салынган. Кармалган жаран милиция кызматкерлерине өткөрүлүп берилди.