Министрликтин маалыматына ылайык, мамлекет жеке менчик бала бакчалардагы төлөмдүн 50 пайызын өз мойнуна алууга даяр, башкача айтканда, бала үчүн бакчага берилчү каражаттын теңин төлөп берет.
Долбоорго кимдер, кандай критерий менен катыша алат, баласын жарым төлөм менен бакчага берем дегендер кандай документ даярдашы керек? Долбоорго Бишкек шаарындагы жеке бала бакчанын баары киреби? Бул суроолорго Билим берүү жана илим министрлигинин жетектөөчү адиси Нурзида Касымова жооп берди.
Долбоор тууралуу
15-майга чейин долбоорго катыша турган жеке менчик бала бакчалар документтерин тапшырган. Эми 1-июнга чейин балдарга социалдык талон алуучулардын (ата-энелердин) документтери кабыл алынмакчы. Бул пилоттук долбоор болгондуктан быйыл Бишкек шаарында гана иштейт.
Социалдык долбоор кызматын кимдер колдоно алат?
- Көп балалуу үй-бүлө (5 жана андан көп баласы бар);
- Аз камсыз үй-бүлө;
- Баккан адамынан айрылган, үй-бүлөнүн жалпы кирешеси 12 миң сомдон кем болгон бүлө;
- Ата-энесинин бирөө I же II топтогу майып болсо;
- Ата-энесинин бирөө же экөө тең мамлекеттик, муниципалдык кызматкер жана алардын ар биринин орточо айлык акысы 12 миң сомдон кем болсо.
Кандай документтер керектелет?
Жалпы документтер:
- Долбоорго катышуу боюнча арыз;
- Ата-энесинин паспортторунун көчүрмөсү;
- Баланын туулгандыгы тууралуу күбөлүгү;
- Балага медициналык маалымкат.
Көп балалуу үй-бүлө үчүн кошумча документ:
- Үй-бүлөнүн курамы тууралуу маалымкат.
Аз камсыз болгон үй-бүлө үчүн кошумча документ:
- Социалдык өнүгүү башкармалыгынын кирешеси тууралуу маалымкаты;
Ата-энесинин бирөө I же II топтогу майып болгондорго кошумча документ:
- Ата-энесине медициналык-социалдык комиссия берген корутунду (МСЕК)
Баккан адамынан айрылгандар үчүн кошумча документ:
- Үй-бүлөнүн курамы тууралуу маалымкат;
- Иштеген жеринен акыркы алты айда алган айлык маянасы тууралуу маалымкат же социалдык өнүктүрүү башкармалыгы берген үй-бүлөнүн жалпы кирешеси тууралуу маалымкат;
Мамлекеттик, муниципалдык кызматта иштегендер үчүн кошумча документ:
- Ата-энесинин экөөнүн тең иштеген жеринен акыркы алты айда алган айлык маянасы тууралуу маалымкат. Эгер биринин эле айлык акысы 12 миң сомдон жогору болсо, долбоорго катыша албайт. (Аталган маалымат кат жарым жыл сайын жаңыртылып турушу керек).
Аталган документтин баарын арыз ээси Билим берүү жана илим министрлигине барып тапшырышы керек. Мекеменин дареги: Тыныстанов көчөсү, 257.
Балдардын жашы кандай болушу керек?
Бакчага барчу наристелердин курагы 3 жаштан 5 жашка чейин болушу зарыл.
Социалдык долбоорго Бишкектеги бардык жеке бала бакчалар катышып жатабы?
Долбоордун алкагында акысы кымбат бакчалар да барбы?
Бишкек шаарында 79 менчик бала бакчага анализ жүргүзүлдү. Анда айына бир балага 6 миң сом алган 9 эле бакча бар экени аныкталган. Көбү 8-10 миң сомдук бакчалар. Жобо боюнча социалдык долбоорго бир балага айлык акысы 12 миң сомдон ашык бакчалар киргизилген жок.