БИШКЕК, 27-май — Sputnik. Өкмөт атамекендик өндүрүүчүлөрдү колдоо максатында Мамлекеттик сатып алуулар системасын реформалоо иштерин жүргүзүп жатат. Бул тууралуу Финансы министрлигинин сайтында жазылган.
Мисалы, Кыргызстанда өндүрүлгөн товарлардын жана кызмат көрсөтүүлөрдүн электрондук каталогу түзүлөт.
"Бул каталог аркылуу соода кылган ишканаларга арзандатуулар каралат. Ошондой эле компаниялар товардын өндүрүүчүсү менен түз келишим түзө алат", — деп айтылат билдирүүдө.
Бул кадам жергиликтүү товар өндүрүүчүлөрдү колдоодон тышкары тендердин таза өтүшүнө жана убакытты үнөмдөөгө жардам берет.
Электрондук каталог пилоттук негизде 25-мартта ишке киргизилген.
Ага өз товарларын жана кызматтарын каттайм деген ишкерлерге министрлик кеп-кеңеш жагынан жардам көрсөтүүгө даяр экенин билдирет.