Чет өлкөдө бир жылда 20 килограмм бал топтошот, ал эми Кыргызстанда аны бир күндө чогултушат. Бул тууралуу Казим Каракетов Sputnik Кыргызстан радиосунун таңкы эфиринде маек куруп жатып билдирди.
Анын айтымында, чет мамлекеттерде Кыргызстандын ак балы өзгөчө бааланат.
"Кыргызстандын табияты балчылыкты өнүктүрүүгө абдан ыңгайлуу. Биздин өлкөдө аарылар үчүн азык боло турчу бардык өсүмдүктөр бар. Мындан улам аарылардын саны көбөйүп, балдын өндүрүлгөн көлөмү да, сапаты да жогору. Чет өлкөдө аарыларга атайын азык камдап берип өстүрүшөт. Алар перга жана өсүмдүк чаңына муктаж. Мисалы, Түркия аларды Кытайдан сатып алып, аарыларын азыктандырат. Бирок андан деле пайда аз, аарылары өспөйт. Бизде болсо андай кыйынчылык жок. Табиятыбызда аарылар үчүн бардык керектүү заттар бар. Мындан улам кыргыз балчылары бир күндө өндүрө турчу балды чет өлкөдө бир жыл чогултушат. Учурда кыргыз балына болгон суроо-талап өсүп, ал акырындык менен брендге айланууда ", — деди Каракетов.
Ошондой эле ал учурда Кыргызстанда 49 балчы өз бал азыгын экспортко чыгарарын кошумчалады.