"Маданият Советтер Союзунан калган система менен эле келе жатат. Ал араба эскирди, дөңгөлөктөрү түшүп калды. Азыркы заманга ылайык келбей калды. Аны кылчайып карап койгон киши жок". Мындай пикирин Садык Шер-Нияз Sputnik Кыргызстан радиосунун таңкы эфиринде маек куруп жатып билдирди.
Анын айтымында, маданиятты базар экономикасына ылайыкташтыруу зарыл.
"Өлкө бюджети жыл сайын эле дефицит менен кабыл алынат. Өкмөттө акча жок, андыктан бюджетти карап отурган тармактар өнүкпөй келет. Жеке менчикке өткөрүп берген, мисалы, курулуш жааты, соода, тейлөө тармагы жылдан-жылга өсүп жатпайбы. Маданиятты да ушундай кылып базар экономикасына тууралашыбыз керек. Мисалы, мамлекеттик театрларга жыл сайын 300 миллион сомдон ашуун каражат бөлүнөт. Ал эми кино тармагына 50 миллион сомдун гана тегерегинде акча каралат. Бирок бүгүнкү күндө эл аралык деңгээлге чыгып, азыноолак таанылып жаткан бул кинематография жааты. Кино жаратуучулар бөлүнгөн аз көлөмдөгү каражатты өз ара туура пайдаланып, коммерциялык кинонун да өнүгүшүнө шарт түзүп беришти. Бүгүнкү күндө кино жаатындагы акчанын 90 пайызы элден келип жатат. Мына ушул эле жол менен маданияттын башка тармактарын өнүктүрсө болот", — деди депутат.
Эл өкүлү атаандашуу механизмисиз өнүгүү болбойт деген пикирин кошумчалады.