БИШКЕК, 20-май — Sputnik. Президент Сооронбай Жээнбеков ЖККУнун Парламенттик Ассамблеясы кеңешинин көчмө жыйынына катышуу үчүн Кыргызстанга келген Россиянын Мамлекеттик думасынын төрагасы Вячеслав Володин менен жолукту. Бул тууралуу президенттин маалымат кызматынан билдиришти.
Жолугушууда Жээнбеков Россия Кыргызстандын стратегиялык өнөктөшү экенин жана кызматташууда өзгөчө мааниге ээ деди.
"Россиялык достор менен болгон ар бир жолугушуу биздин өлкөлөр ортосундагы өз ара пайдалуу өнөктөштүктү тереңдетүүгө жана кеңейтүүгө кошулган салым болот. Ошол эле мезгилде эки тараптуу жана көп тараптуу мамилелердин олуттуу маселелерин талкуулоо үчүн жакшы мүмкүнчүлүк болот", — деди Жээнбеков.
Ал ошондой эле парламенттер аралык кызматташтыктын жогорку деңгээлин баса белгилеп, 2017-жылы Вячеслав Володиндин түздөн-түз колдоосу менен Кыргызстандын жана Россиянын жарандарына айдоочулардын улуттук күбөлүгү боюнча иштөөгө мүмкүнчүлүк берген мыйзам кабыл алынганын эске салды.
Мамлекет башчысы Россия президенти Владимир Путиндин Кыргызстанга мамлекеттик иш сапарынын жыйынтыгы боюнча жалпы суммасы 6 миллиард доллардан ашкан келишимдерге кол коюлганын эске салды.
Өз кезегинде Вячеслав Володин Жээнбековго Владимир Путиндин саламын жана жакшы каалоолорун айтып, Россия менен Кыргызстан Жамааттык коопсуздук келишими уюмуна кирген стратегиялык өнөктөштөр экенин, бул эки өлкө ортосундагы ишенимдин жогорку деңгээлде экенин далилдеп турганын белгиледи.