БИШКЕК, 20-май — Sputnik. Кыргызстандыктардын арасындагы "Сабаттуу бол" деп аталган жат жазуу акциясынын Бишкек шаары боюнча жыйынтыгы чыгып, мыкты баа менен кошо "0" алгандар да болду. Бул туурасында Мамлекеттик тил боюнча улуттук комиссиянын төрагасы Назаркул Ишекеев Sputnik Кыргызстан маалымат агенттигине айтып берди.
Бишкек шаарынан жат жазуу жазган 1100 кишинин ичинен 63 киши "эң мыкты" деген баа алган.
"Ал эми калган баалардын ээлеринин аты-жөнүн ачыктабайбыз. Жат жазууларды биздин сайтка коёбуз. Анын ээлери барактын чекесиндеги шифрлар менен канчага жазгандыгын сурап билип алса болот", — деди Ишекеев.
Алардын арасында "5", "4", "3", "2", "1" жана "0" бааларын алгандар бар.
Жат жазууларды 12 кишиден турган комиссия текшерген. Алардын арасында жогорку окуу жайлардын окумуштуулары, мектеп мугалимдери, журналисттер болду.
Комиссия мүчөлөрү акциянын жаман баа алган катышуучулары тамгалардан сырткары, өтө одоно, тагыраагы бир сөздү экиге бөлүп жазган учурлары бар экендигин айтышты.
Диктант жазгандардын арасында мамлекеттик кызматтагылар болгондугун, алардын арасында ката жазгандар да, мыкты жазгандар да бар экендигин айтышты.
Республика боюнча жат жазууну 25 000 киши жазгандыгы жана аны текшерүү иштери учурда облустарда жүрүп жаткандыгы кошумчаланды.
Диктантты Жогорку Кеңештин депутаты Чыныбай Турсунбеков, белгилүү диктор Гүлшан Молдоева, алып баруучу Нурзат Токтосунова, КТРКнын алып баруучусу Расул Багышбек уулу, маданият, маалымат жана туризм министринин орун басары Нуржигит Кадырбеков жана башка бир нече адамдар окуган.
"Интонация менен окушту. Тыныш белгилерге токтолгон жок деген сын пикирлер айтылды", — деп билдирди Ишеналиева.
Алар жакында баалардын жыйынтыгын толук чыгарып, мыкты жат жазуу ээлерин коомчулукка жарыя кыла тургандыгын айтышты.