БИШКЕК, 7-май — Sputnik. Париждин 19-районунун полиция комиссариатынын имаратын бүргө каптап жабылууга аргасыз болду. Бул тууралуу Alliance укук коргоо профсоюзу билдирди.
Ага ылайык, полициянын имараты көп жылдан бери курт-кумурсканын чабуулуна кабылып келгендиктен, кызматкерлерге да бир топ кыйынчылык жараткан.
"Кызматкерлер түрдүү курт-кумурскалар чагып алганын айтып, дарыгерлерге көп кайрылып келишкен. Эң коркунучтуусу, алар мителерди үйүнө чейин алып келип, жашаган үйүнө да жуктурушу ыктымал", — деп уюм өзүнүн Twitter баракчасына жазды.
Профсоюз бийликтин эч нерсе кылбаганын сындап, имараттагыларды коопсуз жайга чыгарып, бардык санитардык иштер жасаларын эскертти.