БИШКЕК, 7-май — Sputnik. Борбор калаада таштанды боюнча жаңы полигонду куруу иштери башталгандыгын муниципалитеттин маалымат кызматынан кабарлашты.
Аны менен катар эле эски таштанды жайды жабуу жана рекультивация иштери жүрүп жатат. Жаңы полигон мурдагысынан 500 метр алыс аралыкта жайгашат.
Аталган долбоор Европа биримдиги жана Европалык реконструкциялоо жана өнүктүрүү банкы тарабынан каржыланмакчы.
Биринчи этапта жерди даярдоо иштери жүрүп жатат. Жерди казганда чыккан топурак-таштар эски жайды жабууга жана рекультивация иштерине жумшалмакчы. Жаңы полигондун аймагына таштандыны иргей турган завод курулаары пландалууда.
2017-жылы «Бишкек санитардык полигону" ишканканасы менен эстониялык Ehitusfirma Rand Ja Tuulberg деп аталган компания эскисин жаап, жаңысын куруу боюнча келишимге кол койгон.
Келерки жылдан тарта борбор калаада катуу таштандылар үчүн жаңы полигон пайда болуп, эскиси жабылары айтылган. Бул иштерге жалпысынан 22 миллион евро бөлүнгөн.