БИШКЕК, 30-апр. — Sputnik. Президент Сооронбай Жээнбеков Бишкектеги жыйынга келген ЖККУга мүчө мамлекеттердин коргоо министрлерин кабыл алды. Бул тууралуу мамлекет башчынын маалымат кызматынан кабарлашты.
Президент министрлерди Улуу Ата Мекендик согуштагы Жеңиштин 74 жылдыгы менен куттуктады.
"Советтер Союзу учурунда биргелешип, бири-бирибизге жардамдашып, аскерий коопсуздукту камсыз кылчубуз. Согуш мезгилинде биздин аталарыбыз жана чоң аталарыбыз ийин тийиштире мекенибиздин сакчылыгында турушкан. Азыр да биздин аймактарды тышкы агрессиядан жана терроризмден коргоо ЖККУнун башкы милдети болуп саналат", — деди Жээнбеков.
Мамлекет башчы дүйнөдө болуп жаткан глобалдык өзгөрүүлөр, уюмдун жооптуу зонасындагы өсүп жаткан коркунучтар жогорку деңгээлде биргелешип аракеттенүүнү талап кыларына көңүл бурду.
Ал эми ЖККУнун коргоо министрлеринин атынан Белоруссиянын коргоо министри Андрей Равков Сооронбай Жээнбековго ийгиликтерди каалады.
Президент менен жолугушууга ЖККУнун башкы катчысынын милдетин аткаруучу Валерий Семериков, ЖККУнун бириккен штабынын башчысы Анатолий Сидоров, Армениянын коргоо министри Давид Тоноян, Белоруссиянын коргоо министри Андрей Равков, Казакстандын коргоо министри Нурлан Ермекбаев, Россиянын коргоо министри Сергей Шойгу жана Тажикстандын коргоо министри Шерали Мирзо катышты.