БИШКЕК, 29-апр. — Sputnik. Кыргыз эл артисти, Токтогул атындагы мамлекеттик сыйлыгынын, "Манас" ордени, "Даңк" медалынын ээси Сатыбалды Далбаев 85 жаш курагында дүйнө салды. Бул тууралуу Маданият, маалымат жана туризм министрлигинин маалымат кызматы билдирди.
Сатыбалды Далбаев 1934-жылы Жалал-Абад облусуна караштуу Базар-Коргон районундагы Ооган-Талаа айылында туулган.
Ал орто мектепти аяктагандан кийин 1952-жылы Москва шаарындагы мамлекеттик театр өнөрү институтунан (ГИТИС) билим алган. Москвадагы Луначарский атындагы мамлекеттик жогорку театралдык институтунда 5 жыл окуп, профессор Михаил Чистяков сыяктуу советтик театр чөйрөсүндөгү мыкты окутуучулардан таалим-тарбия алган.
Аталган институтту 1957-жылы аяктап келип, курсташтары Асанбек (Арсен) Өмүралиев, Болот Шалтаев, Зоя Молдобаева, Жанузак Молдобаев жана башкалар менен Кыргыз мамлекеттик академиялык драма театрына артист болуп кабыл алынган.
Театрда жарым кылымдан ашуун эмгектенип, дүйнөлүк жана кыргыз драматургиясы боюнча коюлган ондогон спектаклдерде башкы ролдорду ийгиликтүү ойноп, кыргыз көрүүчүлөрүнө белгилүү болгон.