Пансионат жана суу жээгиндеги эс алуучу жайларда ар бир 100 метр сайын экиден куткаруучу болушу керек. Бул тууралуу Урматбек Шамырканов Sputnik Кыргызстан радиосунун "Ачык кеп" уктуруусунда маек куруп жатып билдирди.
Анын айтымында, куткаруучулар Бишкек жана Чолпон-Ата шаарларына келип, суучулдар кызматынын атайын окуусунан өтсө болот.
"Жайкы эс алуу мезгилинин жакындашы менен бардык пансионаттар жана көлмөсү бар эс алуучу жайлардын кожоюндары куткаруучуларды даярдоого тийиш. Себеби өкмөттүн суу объектилеринде коопсуздук эрежелерин сактоо боюнча 466-токтомуна ылайык, суу жээгинде эс алуучу жайларда ар бир 100 метр сайын экиден куткаруучу болуш керек. Эгер эс алуучу жай бул талапты аткарбаса, анда ишмердүүлүгү токтотулат. Куткаруучунун сууда жардам көрсөтө алат деген тастыктоочу сертификаты болушу кажет. Аталган тастыктоочу күбөлүк суучулдар кызматы тарабынан гана берилет. Ошол себептен куткаруучулук кызматты аркалайм дегендер суучулдар кызматынын Бишкек жана Чолпон-Ата шаарларындагы өкүлчүлүктөрүнө кайрылып, окуп алышса болот. Окутуу жай мезгилине чейин жүргүзүлөт. Муниципалдык эс алуучу жайлардын куткаруучулары акысыз окутулат, ал эми жеке пансионаттардан келгендер 3 400 сом төлөп үйрөнүшөт. Мындан сырткары, биз түшүндүрүү иштерин жүргүзүп, атайын эскертмелерди, китептерди таратып турабыз", — деди Шамырканов.
Ошондой эле ал быйылкы жылы сууга чөккөндөрдүн саны 13 кишиге жеткендигин кошумчалады.