БИШКЕК, 27-апр. — Sputnik. Казакстан менен Кытайдын бажы кызматтары чек арадан өткөн жүк боюнча онлайн түрүндө маалымат алмашууну макулдашты. Мындай аракеттер "Бир алкак — бир жол" форумунун алкагында ишке ашканын Sputnik Казакстан агенттиги жазды.
Ага ылайык, кол коюлган документ тарыхый мааниге ээ. Эми казак менен кытай бажычылары чек арадан өткөн жүк боюнча маалыматтарды алмашып, методологиялык жана маалымдоо жагынан да бирге иштешүүгө жол ачылды.
Sputnik Кыргызстан маалымат агенттиги буга чейин Кытай менен Казакстандын бажысынан өткөн товарлар боюнча эки мамлекеттин тийиштүү органдарынын маалыматтарын салыштырган. Акыркы 15 жылда Кытайдын эсеп-чоту боюнча Казакстанга 130,6 миллиард долларлык товар алынып келген, ал эми казак тараптын билдиришинче, Кытайдан 66,6 миллиард доллар товар келген. Эки мамлекеттин маалыматында 64 миллиард долларлык айырма бар.