Кыргызстандык балбан Айсулуу Тыныбекова Кытайдын Сиань шаарында өтүп жаткан Азия чемпионатынан алтын утту.
Мелдешти Бириккен күрөш уюму сайтынан түз көрсөткөн. Анда Айсулуу кармаштын акыркы секундасында жеңишти атаандашынан жулуп алганын көрүүгө болот.
6:5 эсебинде жеңилип баратып, 10 секунд калганда ыкма жасап, артка көтөрүп чаап эки упай алган. Буга япониялык спортчунун машыктыруучусу нааразычылыгын билдирген. Калыстар кайра карап чыгып, кыргызстандык спортчунун пайдасына чечкен. Натыйжада дагы бир упай кошулуп
Тыныбекова 62 килограмм салмак категориясы боюнча күч сынашкан. Ал финалда япониялык Юкако Кавайи менен кез келип жеңип алганы айтылат.
Кыргызстандык балбан биринчи кармашында өзбекстандык Набира Есенбаеваны 10:0 эсеби менен жеңсе, жарым финалда таиланддык Салини Срисомбатты 8:0 упай менен утуп алган.
Айсулуу Тыныбекова ушуну менен Азиянын үч жолку чемпиону аталды. Ал 2016-жылы Бангкокто жана 2017-жылы Индияда өткөн Азия чемпионатында алтын медаль тагынган болчу. Рио-де-Жанейродо өткөн Олимпиадада бешинчи орунду алган. Ошондой эле Азия оюндары жана Ислам тилектештиги оюндарында чемпиондукту багындырган. 2017-жылы Дүйнө чемпионатынан коло алган. Мындан сырткары, күмүш, коло медалдарды бир нече ирет уткан. КРдин эмгек сиңирген спортчусу, "Даңк" медалынын ээси.