ОШ, 22-апр. — Sputnik. Ош шаардык клиникалык ооруканасынын жаңы курулган имараты ачылып, пайдаланууга берилди. Бул тууралуу оорукананын башкы дарыгери Шайитбек Абдрахманов Sputnik Кыргызстан агенттигине билдирди.
Оорукананын ачылыш салтанатына өлкө башчысы Сооронбай Жээнбеков катышты.
Аталган оорукана Ош шаарынын Ак-Тилек кичирайонунда жайгашкан. Үч бөлүктөн туруп, амбулатордук-диагностикалык, стационардык жана администрация бөлүмдөрү бар.
"Үч корпус коридорлор аркылуу бириктирилген. Имаратты курууга 25 миллион 800 миң доллар сарпталып, каражатты Кытай өкмөтү Кыргызстанга кайтарымсыз грант түрүндө берген", — деди башкы дарыгер.
Ал эми стационардык корпус 150 орунга ылайыкташтырылган. Заманбап, бардык керектүү шарттар түзүлгөн.
Администрация бөлүмүндө кызматтык бөлмөлөр, эсеп бөлүмү, телемедицина жана 200 орунга ылайыкташкан конференц-зал бар.
Шаардык оорукана медициналык заманбап гастроскоп, лапароскоп, колоноскоп, эхокардиография сыяктуу жабдуулар менен камсыздалган.
"Бул аппараттарды иштетүү боюнча дарыгерлер чет өлкөлөрдөн окуп келишти. Ал эми бул жылы дарыгерлерди Кытайга окууга жиберүү боюнча учурда Кытай элчилиги менен сүйлөшүүлөрдү жүргүзүп жатабыз", — деди Абдрахманов.
Ооруканада дарыгерлер, медайымдар жана кичи медкызматкерлер болуп жалпы 356 киши иштейт. Ош шаардык клиникалык ооруканасынын эски имаратына калаадагы үй-бүлөлүк дарыгерлер бөлүмү жайгаштырылат.