Орточо эсеп менен алганда дартка даба болчу дарынын бир инъекциясы 400-500 доллар турат. Бул тууралуу Мирлан Кудайназаров Sputnik Кыргызстан радиосунун таңкы эфиринде маек куруп жатып билдирди.
Анын айтымында, коомчулуктун бир гана пайызы гемофилия илдетинен жапа чеккендиктен, бул ооруга каршы дары-дармектер аз өлчөмдө өндүрүлөт.
"Гемофилияга даба болчу дары адамдын канындагы плазмадан жасалат. Алар чет өлкөдө өндүрүлгөндүктөн анын курамындагы кан адамдын органындай бааланат. Ошол себептен дарынын баасы да кымбат. Инъекциялар эл аралык бирдик менен эсептелип, фактор деп аталат. Бир эл аралык бирдиктин баасы 0,12 центке барабар. Мисалы, салмагы 60 килограммдык оорулуу кулап, денесинен жаракат алса ага эки миң эл аралык бирдик менен инъекция куюлат. Анын баасы болжол менен 400-500 доллар. Бул сумма гемофилия менен ооруган адамдын бир күндүк дарылануусуна жумшалчу каражат. Ал эми оорулуу көп күнгө чейин айыкпаса, анда аталган сумма он эсе көбөйүшү мүмкүн. Жөнөкөй жарандардын минтип дарыланууга чамасы жетпейт. Ошол себептен мамлекет жана эл аралык уюмдар тарабынан гемофилияга каршы дары-дармектер алынып, оорулууларга акысыз берилет. Бирок ал дагы жетишсиз", — деди Кудайназаров.
Ошондой эле ал гемофилия менен ооруган жарандарга бардык медициналык жардам акысыз көрсөтүлөрүн кошумчалады.