Видеодо жолдун четинде туннелге жакын жерде капталына оодарылып калган жүк ташуучу автоунааны көрүүгө болот. Анын жанында кран иштеп жатат жана бир нече киши жүрөт. Күбө видеону Кара-Көл шаарына жакын жерден тартып алганын билдирди.
Жалал-Абад облустук ЖКККБнын маалымат кызматы жол кырсыгы 13-апрелде Бишкек — Ош жолунун 409-чакырымында саат 22:45тер чамасында болгонун ырастады.
"Тажикстандын 24 жаштагы тургуну Ош шаарын көздөй жүк ташуучу автоунааны айдап баратып рулду башкара албай, машинаны дароо бурганда, унаа бетон тосмого урунуп, жол четине оодарылып калган", — деп милициядан кабарлашты.
Айдоочу жаракат алып, Кара-Көл шаарындагы ооруканага жеткирилген. Учурда тийиштүү экспертизалар дайындалды.