БИШКЕК, 17-апр. — Sputnik. Аламүдүн районундагы Константиновка айылында дарыяга чөгүп кеткен 5 жашар Барсбек Бектемировдун кош бойлуу апасы ооруканага жатуудан баш тартып койгон. Бул тууралуу Sputnik Кыргызстан маалымат агенттигине Ленин райондук үй-бүлөлүк дарыгерлер тобунун дарыгери Гүлмира Досалиева билдирди.
Эске салсак, 11-апрель күнү бөбөк Ат-Башы дарыясына түшүп кетип, азыркы күнгө чейин табылбай жатат.
Келиндин абалы начарлап жаткандыгына байланыштуу Саламаттык сактоо министрлиги кечээ аталган үй-бүлөгө дарыгер жана психолог жөнөткөнүн билдирген.
Гүлмира Досалиева кечээ, бүгүн дагы кош бойлуу келиндин абалы менен таанышып, келин дарыгерлер менен кеп-сөзгө келбей койгонун айтты.
"... Абалын түшүнүп турам. Бирок ичиндеги наристени да ойлош керек. Биз барган учурда "жайыма койгула" деп сүйлөшкүсү да келбей койду. Кайненесинин айтымында, бир аздан тамак жеп жатыптыр. Бирок аз. Түйүлдүккө 24 жума болуп калыптыр". Ооруканага буга чейин жаткан экен, бирок психологиялык жактан жаман болуп жатса, ал дары деле жардам бербейт го. Анын үстүнө өзү да оорукананы уккусу келген жок. Психолог менен сүйлөш десек да болбой койду. Биздин районго карагандыктан, абалына көз салып турабыз", — деди Досалиева.
Жаш үй-бүлөнүн туугандарынын айтымында, бөбөк Константиновка айылында чоң эне, чоң атасы менен жашап жаткан. Аталган айылдын бакчасына да барчу экен. Ата-энеси Ак-Бата жаңы конушунда туруп, уулун дем алыш күндөрү алып кетип турушканы маалым болду.
Бөбөктү издөө иштери азыр да уланып жатат. Алгачкы күнү аны издөөгө 11 куткаруучу тартылып таппай, 15-апрелде издөө иштерине 100гө чукул куткаруучу чыккан.
Кечээ издөө иштерине көмөк көрсөтүү максатында Казакстан ИИМинин Жамбыл облустук Өзгөчө кырдаалдар департаментинен төрт суучул да тартылган.